გვიანი ზრდასრულობა (მოხუცებულობა) და ფსიქოლოგიური კეთილდღეობა

ანოტაცია

წარმოდგენილი სტატია ეხება ფსიქოლოგიური კეთილდღეობის დონის შესწავ­ლას გვიანი ზრდასრულობის (მოხუცებულობის) ასაკში.

გვიანი ზრდასრულობა წარმოადგენს განვითარების ერთ-ერთ მნიშვნელოვან ეტაპს. განვითა­რე­ბის ფსიქოლოგიის მკვლევარებს სხვა საკითხებთან ერთად, აინტერესებთ მოხუცებულების ფსიქოლოგიური კეთილდღეობის შესწავლა.

ფსიქოლოგიური კეთილდღეობა - ეს ადამიანის მთლიანპიროვნული მდგომარეობაა, რომელ­შიც აისახება ცხოვრებით კმაყოფილება და ფსიქიკური ჯანმრთელობა.

კვლევის მიზანი იყო იმის დადგენა, თუ როგორია ქართველი მოხუცების ფსიქოლოგიური კეთილდღეობის დონე, შეინიშნება თუ არა იგივე ტენდენციები, რაც დადასტურებულია უცხოურ კვლევებში, სადაც ნაჩვენებია, რომ მხოლოდ ასაკი არ განსაზღვრავს ცხოვრებით კმაყოფილებას, უფრო მნიშვნელოვანი ფაქტორებია ჯანმრთელობა, სოციალური ინტეგრაცია, ოჯახური პირობები და ადამიანის მიერ საკუთარი თავის აღქმა.

კვლევაში მონაწილეობა მიიღო 32-მა ადამიანმა, რომელთა ასაკი იყო 60–79 წელი. კვლევის ინსტრუმენტი იყო კეროლ რიფის ფსიქოლოგიური კეთილდღეობის საკვლევი სკალა. ვვარაუდობ­დით, რომ ქართველ მოხუცთა ფსიქოლოგიური კეთილდღეობის დონე იქნებოდა უფრო დაბალი, ვიდრე ამას აჩვენებს უცხოური კვლევები.

თუმცა, კვლევის შედეგებმა აჩვენა ზომიერი, დადებითი და სტატისტიკურად მნიშვნელოვანი კავშირი ასაკსა და კეთილდღეობას შორის (ρ = .37; p = .038), რაც იმაზე მეტყველებს, რომ ასაკის მა­ტებასთან ერთად კეთილდღეობა პირიქით, იზრდება. მიღებული შედეგები ეხმაურება თანამედ­რო­ვე კვლევებს, რომლებიც აჩვენებს, რომ ფსიქოლოგიური კეთილდღეობა არაა დამოკიდებული მხოლოდ ასაკზე.